2019年3月3日 星期日

失蹤人口報告/ 近況


對上一篇blog文已係12月頭,個時話希望之後有時間寫多d野,但搞搞下又失蹤左一個季,所以襯住岩岩好3個月,點都要上黎update下。

新工作都幾忙,唔係話要勁夜先收個種,但office hour內基本上已經用晒D腦力,唔會想做其他野。工作環境係點?Well,基本上所有大公司應有既pros and cons佢一應俱全,特別係衰個方面。

d政治煩到嘔,舊公司做野其他好簡單:就係一心一意諗點做,因為上面好廢,好大程度上得你一個人做(我其實幾enjoy呢種方式)。而係呢度,第一步就係要諗點推比人做……..我間公司同另一間peersAUM差唔多,客戶組合都係咁上下,但profit只係人地既一半,唔係冇理由。

但好處係,我既job exposure基本上係top of the class,而且人工依然係underpaid,要走既話極為容易,而對我個team黎講,我個位既switching cost唔低(ie同事可唔可以放假,直接取決於有冇我既存在),意味住佢就算唔肯加我人工,我都可以嘗試屈下其他福利(例如屈供我讀master),所以基本上算係the high is worth the pain

另一方面,呢行其實好透明,你咪以為恃住公司個朵勁就可以出黎打橫行,人地其實咩都知,我黎到呢邊,好多人都識舊檔個個剩係識飲酒個上司,新同事講親佢都冇好說話。同樣地新公司內都d咩都唔識既廢柴(當然亦有好勁好勁好勁既人),壞處係佢會阻住你做野,好處係呢種情況下依然可以get things done既話,其實人地有眼睇得到。

講番投資,呢幾月做既較重要決定有:

1.      終於的起心肝去買債券資產,我諗之前都提好多次,新興市場同亞洲債券既估值異常吸引……我一路都恨買個張KWG 202011月發行到而家已經升左5蚊,但囉命陳話係高風險投資,要專業投資者先買得,你又可以點?冇咩點,咪認命每年豪1.25%比基金公司……選左一隻track record比較好既亞洲債券基金,同埋市面上duration最短既EMD基金。YTD反彈個一波其實好勁,但我覺得個relative value依然係度,如果有門路既話,我會去short DMEMspread。我亦預期如果宏觀環境唔係出現斷崖式下跌既話,今年債券資產有機會錄得資本增值(ie賺得多過yield),而且因為個盤慢慢變大,有番d return distribution比較正常既資產係好事。

2.     
其實之前已經講過暫時唔會買樓,因為對我黎講既無用家價值,又無投資價值,但有少少客觀環境既轉變—就係識左女朋友,進展都幾快,開始要諗用家呢部分。

頭都痕埋,我既能力只能用按保買600萬以下既盤,600萬有咩選擇?人地本身住港島,而且兩個人都港島番工,要結既話,冇理由要佢跟我住新界掛。要住市區,呢個budget又好難買得落手。用按保買,你又唔可以租比人然後自己比去租番層市區樓住,問財仔借8/9成買新盤我又淆。除左叫我唔好心頭咁高,或者係直接分手之外,如果大家有d咩良策既話歡迎提供。

Having that said,我唔係話要樓價一定跌,但至少我既財富增長可以outrun到樓價升幅就得(即係唔係暴升),所以天無絕人之路既係好多資產依然有value係度。我亦都係股票組合加入左「樓價因子」,即係買入會令價樓上升既attribution factor,例如蔡金強話如果大陸仆直對港樓某程度上其實係個plus,我同意,所以我亦增持左有相關屬性既投資—例如友邦。

3.       
手機相關持增全數沽售,雖然2382差唔多算係摸底走,但託賴瑞聲90蚊走到,拉混都算係咁,成個產業鏈都差,無謂鬥氣。舜宇因為個D咩六鏡頭設計而走強,但當時既沽售理由係:SonyGoogle機單鏡頭既拍攝能力比好多雙鏡三鏡機仲好,我已經唔肯定多鏡頭係咪一個不可逆既trend

重倉股入面,ATVI走勢勁弱,$55加注個野仲要輸錢,但目前既價格基本上已反映緊零增長,係信心問題多於基本面問題,因為當年Blizzard North班元老集體離職個野都冇trigger到咁大幅度既下跌,如穿$40會再加,遊戲依然係未來10年最promisingtrend,連EA呢d咁垃圾既公司都可以come back,我唔會太過擔心ATVI

頂住個盤既係領匯、申洲同香港寬頻,領匯同香港寬頻亦係我定義為「樓價因子」既股票之一,好大程度上可以對沖人口變化帶來既樓價升幅,兩間公司亦有above average既管治能力。

QQBABAAMZNV、敏實呢堆持倉不變,冇係$260水平增持QQ係一大失誤。東江(2283)受貿易戰影響較大,但事件同時趕失左一大班實力較弱既同業,屬先苦後甜。

淨增持MSCI Inc.,如果我要選出10隻未來十年冇得輸既股票,MSCI肯定係其中之一。另外襯住QQ收購Nexon既消息,沽清後者。

由於看好大市表現,買入MSXI AxJ ETF

增持ITA,無論下一任總統係黎自邊個黨,中美競爭關係只會越黎越明,唔打仗都好,飛機大炮一定係越買越多,近期破頂只係因為重倉股波音走強而負碌,但長期投資邏輯依然存在。


以下係牢騷時段

即係咁,我老母50歲,做緊半更partime,我老豆60歲,勞動人士,預期頂多做到65歲,然後兩個人加埋仲係一d儲蓄都冇,一個爛賭,一個亂洗,加埋已經百幾歲人,到底想點?

我今年28,佢地仲係好沉醉於我由畢業到而家,由一個net outflow變成inflow既呢個蜜月期,完全唔知其實係好大獲,當我知道佢地真係仙都唔仙個陣,我係即刻去買多份人壽保險,唔係既話如果我有一日猝死,佢地都唔知點算。

我其實拍左兩個月拖咁上下,佢已經同我d咩龍鳳鐲又盛,講到好興奮。呢事件係我心入面屈左好耐,呢次我真係忍唔住要同佢解釋下情況,講講下佢冇啦啦喊左出黎,我諗佢覺得自己係個包袱,我想講唔係,但又真係講唔出口。

咁當然D野唔係下下可以賴,先唔講天字一號例子誠哥,黃仁龍屋企仲窮添,咪又係可以做到個勁人,以前唔夠努力,可以點?咪唯有而家努力D

所以我真係唔係要怪咩野,老豆老母係邊個,你冇辦法選,但應該提醒自己結婚生仔完全係個人選擇,冇心/冇能力既話,絕對係禍害下一代。

住係香港,你話咩野最貴?老實講你又唔會冇屋住,又唔會真係餓死人,真正貴既,係快樂同尊嚴,特別係後者。




44 則留言:

  1. Consider buy uk listee IEMB , emerging market usd bond etf, no need to pay 30% div tax...

    I also want to buy straight bonds , just the fxxking hkma not allow small retail investor to buy the bond but letting them to buy the more risky company stocks...

    回覆刪除
    回覆
    1. 多謝分享, 但條index duration太長(11年), 雖則利率環境好左, 但都唔想take太多R risk
      再加埋我覺得主權債市場有比較大既alpha空間(例如避委內瑞拉呢D雷), 所以買左active fund

      放債高風險過買股票既話, 咁匯豐就唔做借貸啦, 直接用晒d存款買股票啦, 簡直痴線

      刪除
  2. 600萬只能買二百幾呎既市區樓.一係住工廈
    都係慘

    回覆刪除
    回覆
    1. 都係而家先開始明白點解有d兩公婆月入10萬都話買唔到樓

      刪除
  3. 你父母唔生性, 但都養到你咁大, 所以點都要養返佢地 !
    你可能會辛苦D, 所以要努力 !

    回覆刪除
    回覆
    1. 絕對認同...所以我既point係想佢地花多d時間幫自己打算, 而且要意識到有問題存在

      刪除
  4. tam兄應該都係大情大聖之人...

    窮又好懶又好廢又好,好明顯佢地內心係好錫你。雖然父母做咗你ge包袱,但老套啲講句父母得一對,樹欲靜而...

    趁還可以,好好珍惜吧。

    回覆刪除
    回覆
    1. 係workplace同我嘈過交既人應該都會認同我幾大情大聖 hahahahaha

      to some extent佢地人生都幾失敗, 而且都幾十歲人係咁上下, 如果話係佢地既人生scorecard上面仲有d咩可以加分既變數, 就係我, 所以有時覺得做好自己都唔係剩係為自己

      但佢地錫我係肯定既, 可以既話我都希望比到一個好既晚年比佢地

      刪除
    2. Could consider units in TKO like 新都城. Relatively close to HKI.

      刪除
    3. 二八兄,新都城600萬樓下已歿。而且TKO屬於新界,唔合資格。

      刪除
  5. 噢, 發展得好鬼快wor, 原來係溝女高手呢. XD

    回覆刪除
  6. 拍得兩個月咁快就諗結婚?
    依家重係蜜月期, 當然覺得對方好, 相處耐d先再算啦!結婚係人生最大既投資, 咪一時衝動。

    回覆刪除
    回覆
    1. 我要結人地都未必肯嫁我啦! 只不過係以呢個為前主題做d準備

      刪除
  7. TAM兄,歡迎回歸。

    老土點講句:"一個家族總有一代人要發力,才能給予下一代及上一代更好的環境。"

    如果TAM兄能outrun到樓價升幅,那繼續行你擅長行的路也是理所當然的事。旁人說甚麼,由他們說吧。

    回覆刪除
  8. 愚見認為, 第一個單位重要要是買能力負擔到的,改善到生活先係首選。是否心水(新舊、位置、屋苑)都是其次。我自己就是因為咁搬離自己由細到大生活的市區。

    另外,有一句說話叫天生天養,同樣適用在父母身上,不是不孝,孔子說「父母唯其疾之憂」,擔心父母不如先搞掂自己,自己有餘力先可以回饋父母。香港福利好到不得了,老人家醫療服務更是超班(所以香港人世界最長壽),唔好信蘋果日報、保險公司成日發放負能量,成日話香港福利唔夠,醫療唔好,其實各有各目的。有了這個保護網,再加上你咁醒目搵到錢,你一步一步行,生活實係愈來愈好。

    回覆刪除
    回覆
    1. 散戶兄
      「第一個單位重要要是買能力負擔到的,改善到生活先係首選」呢兩個條件好大程度上係二選一, 再加埋呢個女人同我一齊, 本身就已經唔係一個改善生活既選擇, 所以如果要以結婚首選為目的買樓既話, 其實我都唔知點搞, 唯有睇送食飯

      父母呢點, 其實我都同意香港福利算係咁, 只不過我覺得香港(甚至現今全世界)有樣野, 金錢利率好低, 但人生利率好高, 當我10年後真係有d咩發展, 買個一球既手袋比我老母出去威, 係咪真係比我e家買左2皮既袋比佢有意義?

      我個blog之前剩係講投資, 呢個其實係step 2, step 1係「消費定投資」, 漸漸覺得呢個問題越黎越難答

      刪除
  9. TAM兄唔知有幾多拍拖經驗,但熱戀期間,即使自己平時有幾理性,理智都會受到嚴重衝擊,而且容易合理化好多嘢,得出所謂既「客觀」分析。例如,拍拖兩個月,你會覺得呢個女仔真係好啦,同佢好夾啊,而佢又想早啲結婚,咁結得婚不如買樓啦,佢又覺得買好過租,但其實你地只係拍咗拖兩個月,好多影響婚姻成敗既因素都仲未有機會睇到,例如價值觀,甚至係好簡單既生活習慣究竟夾唔夾,未住過一齊真係唔知。所以,攤長少少,攤凍少少,再慢慢諗,可能會有唔少新觀點新發現。

    我女友都係拍拖唔夠一年,我都因為佢買咗樓,但唔係以結婚為前題,而係以同居測試大家住唔住到係一齊為前題,而且買咗可以對沖返呢項必要開支。

    不過TAM兄負擔得起,其實買與不買就變成好簡單既資產配置問題(睇內容估,應該係你俾哂供哂),咁件事又唔洗諗得咁複雜。兩個人合得嚟,買嚟做新婚居所,係好事;夾唔嚟,層樓又可以變返投資物,又係好事。祝事事順利 :)

    回覆刪除
    回覆
    1. 多謝ryan兄分享經驗, 咁講, 我呢case入面有d因素令我覺得諗咁多不如諗少d hahahaha, 有機會再講

      另外好多blog友都講到置樓既樣野應該係兩個人既事, 其實好make sense, 不過我都想有獨力置業能力為前題, 起碼有間屋住先, 如果先睇下點結合另一半既contribution改善生活

      刪除
  10. 歡迎回歸, 期待你下次作品!

    BTW, 恭喜脫離單身!

    回覆刪除
  11. //我今年28,佢地仲係好沉醉於我由畢業到而家,由一個net outflow變成inflow既呢個蜜月期,完全唔知其實係好大獲,當我知道佢地真係仙都唔仙個陣,我係即刻去買多份人壽保險,唔係既話如果我有一日猝死,佢地都唔知點算。//
    睇到呢度真係好大感觸,我屋企又何嘗唔係咁。廢老豆廿幾年無做嘢,靠老母做一份零售工作賺生活基本所需,個銀行一直都係得幾皮嘢係度,真係一個唔好彩有人病咗死咗就冚家剷,所以我一畢業即係幫自己買多份人壽,再幫阿妹買多一份。宜家靠住兩個人俾既家用,先有NET INFLOW。好彩既係,我父母都無咩不良嗜好,只係真係無能力為自己將來打算,一心諗住靠仔女,呢啲都係好多父母面對既問題,始終時代唔同,觀念唔同。

    有時係度諗,如果我媽唔係咁傳統,唔係對婚姻執着,以佢舊底既背景,可以識到唔少更好既人,改嫁就唔洗捱得咁辛苦,果時係都要攬住個廢青老公都唔知做乜,但佢開心就得啦,而身為仔女,老母盡咗力,而自己盡返孝道就得。TAM兄只可以係自己能力範圍為佢地做最多既嘢,咁已經夠了。

    回覆刪除
  12. 600萬樓下香港島仲有, 不過30年樓320呎左右

    其實樓, 係投資同自住需求都有, 所以先係咁貴
    TAM 兄有自住需求, 係好事

    希望你可以搵到間心儀的樓, 港島/九龍, 俾到600萬係絕對有得揀的
    唔好聽毒果亂講24.

    回覆刪除
    回覆
    1. 唔好話毒果, 呢輪睇得多, 有d覺得中原地個d盤都唔係好update, 睇住佢黎買等於睇aastock d新聞買股票
      所以嘗試expand個agent network先係真正next step

      刪除
  13. 歡迎回歸。

    //住係香港,你話咩野最貴?老實講你又唔會冇屋住,又唔會真係餓死人,真正貴既,係快樂同尊嚴,特別係後者。//
    當長者病果陣, 就會更加體會到「樽鹽」何價。排公立, 可能要等2~3年。入私家, 無保險既話可能用晒你成副身家。
    係香港地生活, 都係自求多福。

    回覆刪除
  14. 其實我又掉返轉睇,如果認定對方是一個好女仔,咁不妨放大個膽Plan下未來,睇定D其實未必有用,時間係唔等人,等待有時會帶來後悔。

    回覆刪除
  15. 雖然拍拖經驗不多, 但我都講下我個case比你參考下
    首先, 你女友同我老婆當年幾似, 佢都係一開始就以結婚前提交往, 唔係玩玩下, 我覺得係好事
    真正由拍拖到結倒婚, 係要好長時間的, 我當你即刻求婚成功, 搵地方擺酒註冊閒閒地都要一年半載, 夠晒時間比你觀察的
    當年我地未夠一年, 我就好似你咁"被求婚"了, 係啱既, 即管應承吧! 香港地好女仔買少見少, 筍盤唔等人架!
    然後, 老婆一度吵大鑊鬧分手, 但多得我地已經 engage 左, 各退一步, 隔日就好返!
    一個好的老婆可以係你人生中一大幫助, 而且還是快樂源源不絕的快樂泉源, 更能讓你把自己的優良血統延續下去, 不過別忘記反之亦然, 發現唔對路的話, 果斷斬纜也是必要的!

    回覆刪除
    回覆
    1. 風輕雲淡兄:多謝分享
      點講好呢, 我地其實兩個人都唔係話要好快就結婚個種hahaha只不過都開始唔後生(特別係我v_v), 拍拖時難免會將婚姻作為考慮因素之一, 但路仲有好遠

      刪除
  16. 新工作都幾忙,唔係話要勁夜先收個種,但office hour內基本上已經用晒D腦力,唔會想做其他野。

    回覆刪除
    回覆
    1. 你都唔洗做其他野啦, 坐係度等823升咪得a_a

      刪除
  17. 最近我重新提筆,更新網誌「股市漫遊」,歡迎譚兄入來討論。
    https://stockcruiser.blogspot.com/
    我也在網誌清單加了您的 blog。

    回覆刪除
  18. 恭喜脫單~~~TAM兄還很年輕可以好好享受拍拖、到結婚生仔後真係好多都不自由~~~~哈哈
    欣賞你盡點孝道買儲蓄人壽保險
    當年我也是這樣買了2間保險公間(行好舊式儲蓄紅利人壽)、結果過了20年
    AIA的那份紅利回報好差(話左供15年break even,結果再找AGENT問問要供25-30年才可break even,行政費食水好深,我就CUT左拿回現金價值買REITS賺股息好過)
    ZIRICH那份紅利回報真的較好,已在20年左右break even左、繼續供也感覺良好
    所以我個覺得選單時都要2間會較安全、而當年的賠付人由父母已改為老婆(怕自己出事她也有畢錢可以養仔女)

    回覆刪除
    回覆
    1. 飛鳥兄:
      我覺得保險就係保險, 儲蓄式其實好晒氣

      刪除
  19. Tam兄, 有私人性質的留言想交流一下, 可否email連絡? (我email: josephleung1108@gmail.com) 可順便介紹靚女給你識. XD

    回覆刪除
  20. 樓方面可以諗吓天水圍嘅柏慧豪園和栢慧豪廷,500呎實用面積大約六百萬。
    天水圍空氣好過市區,銀座對面上967大約40分鐘就到金鐘,969就一小時到灣仔。
    天水圍出入荃灣同旺角佐敦有69m同69x, 去上水有267A,去深圳灣有B2。
    基本上天水圍嘅交通狀況如下,出市區巴士快過地鐵,銀座係巴士總站(包有位坐),出入區內至元元朗屯門就以輕鐵地鐵最快,去羅湖就276A轉地鐵。
    不過區內物價同交通費較高係事實,食肆選擇都有,晨早就有烏叫聲。
    近年鼠患嚴重,揀樓揀高少少。
    全天水圍圍住天水圍公園,圖書館在西鐵站。
    嘉湖山莊就唔好諗,驚你唔記得單新聞提下你。
    加上天水圍冇元朗屯門咁雜,又唔怕塞屯門公路,我都好鍾意住天水圍,元朗好食嘅食銉又多,此預算非佢莫屬。
    坐巴士去荃灣40min丶上水35min丶旺角60min丶深圳30min。
    輕鐵地鐵去元朗屯門30min,入紅館45min。
    元朗街市都好多海鮮賣及民生舖多,皆價廉物美,若女友愛下廚天水圍係好住處,但元朗屯門人多車多路口多,日常出入要小心。
    因此筆者好喜歡住天水圍。

    回覆刪除
  21. 天水圍入夜十點後條街就好靜,車聲唔會擾人清夢,早上都好靜,夜歸只要唔行太僻嘅路段就冇問題,近年區內皇氣多左,治安再改善左。
    天水圍樓價於未來亦會受惠西北面接機埸路開通,當然冇屯門咁受惠,但未來防守性及升值潛力係唔錯。
    地鐵方面,西鐵嘅穩定性好高,上下班時間逼到沙甸魚就係一定,不過區內一向坐巴士較快同舒服,車費平過地鐵,九巴又有 wifi同充電設施。
    入機場有E34A,現已不經元朗,快好多,70分鐘到達,早上班次密左,唔太逼人,而家仲有巴士出入大埔,入沙田就276A轉火車往紅磡方向,60分鐘又到,去羅湖一個站就到。
    天水圍來住各區交通同市區分別唔大,甚至仲快,一來唔使睇地鐵跪低,二來空氣丶治安丶環境好,光污染少,司機駕駛態度良好。
    係坐276A入上水一定要扣好安全帶,因為新田公路太直,司機楂熟左會大意同埋好易睡著出車禍。
    欖隧轉車人多,啲排隊架一有車剷埋嚟多數走唔切,反正轉車都冇位坐就唔好排隊,等佢泊好車先上車就安全。

    回覆刪除
  22. 天水園內醫院都開了,有起事上嚟唔使吓吓出屯門醫院。
    600萬預算真係天水圍呢個屋苑最好,樓齡十年多啲,冇咁快要維修,養貓狗又有大大個公園喺樓下俾你倆口子遛狗。

    回覆刪除
  23. 今日清明早起身預備拜山事宜先清晨回覆,新界西北人就係早出晚歸。

    回覆刪除
  24. Anson兄, 我住左廿幾年天水圍, 唔客氣d咁講, 你所講既野我仲熟過你

    純投資價值黎講, 600以下仲有d yoho盤, 以新地要發展第二個沙田既邏輯去諗, 中短期更有潛力

    住既家更加唔好講, i hate this place

    回覆刪除
  25. 失覺晒,不過元朗一早變成第二個沙田

    回覆刪除